Франциянын азыркы президенти Эммануэль Макрон шайлоонун экинчи айлампасында атаандашы Марин Ле Пенди ишенимдүү түрдө жеңди, ал дагы беш жыл бою Евробиримдиктин экинчи ири өлкөсүн башкарууну улантат.
Добуштардын 100% саналгандан кийин Макрон 58,55%, Ле Пен 41,45% добушка ээ болду.
Анткен менен шайлоонун жалпы жыйынтыгы Макрондун жактоочуларын ойго салууда. Анткени биринчи турдагы добуш берүү коомдогу ажырымды жана ультра оңчулдар менен ашынган солчулдардын күчөшүн көрсөттү.
Бул Макрон үчүн көпчүлүктү жана парламенттик шайлоодон кийинки келген өкмөттү көзөмөлдөөнү жоготот дегенди билдирет деп айтылууда.
Францияда акыркы жыйырма жылдан бери президент кызматынан кетпестен, экинчи мөөнөткө калууда. Макрон шайлоонун экинчи айлампасында атаандашы Марин Ле Пенди ишенимдүү түрдө жеңди.
Макрон биринчи турда да лидер болуп келди, шайлоочулардын 28% добушун алды, анын шайлоого чейинки рейтинги 40 пайыздан ашкан эле. Бирок 28% франциялык шайлоого келбей койду. Мындай бойкот 1969-жылдан бери болгон эмес.
Президент Макрон өлкө экиге бөлүнүп калганын моюнга алып, жеңишке жеткен сөзүндө бүткүл элдин президенти болууга убада берди:
"Мен үчүн эмес, менин идеяларым үчүн эмес, ашынган оңчулдарды бийликтен четтетүү үчүн добуш бергендерге мен карыздармын. Мен мындан ары бир лагердин талапкери эмесмин, бардыгынын президентимин”.
Британиялыктар брекситтен чыгып, биримдиктеги калган 27 өлкөнүн эң чоңу болгон Германияда дүйнөлүк саясатчы Ангела Меркелдин отставкасынан кийин Макрон акыркы жылдары Евробиримдиктин жүзү болуп калды.
Ал шайлоодон кийин калкы жарым миллиарддын тегерегинде болгон Евробиримдикти дүйнөдөгү эң ири саясий биримдикке айлантып, АКШдан кийинки экинчи чоң экономиканы чыңдоо боюнча аракеттерин уланта берерин убада кылууда.
Макрондун Евробиримдик менен НАТОго анча жакын эмес Ле Пенди жеңип чыкканына Франциянын өнөктөштөрү ыраазы болушту. Италиянын премьер-министри Марио Драги шайлоонун жыйынтыгын "бүт Европа үчүн эң сонун жаңылык” десе, Германиянын канцлери Олаф Шольц "Европада ишеним көрсөткөн добуш” деп атады, Испаниянын премьер-министри Педро Санчес "француздар эркин, күчтүү жана адилеттүү Евробиримдикти колдоду” деп айтты. АКШнын президенти Жо Байден Францияны "биздин эң эски союздашыбыз жана негизги өнөктөшүбүз” деп атап, Франция менен тыгыз кызматташууну улантууга, анын ичинде "Украинаны колдоо жана демократияны коргоого” даяр экенин кошумчалады. https://www.bbc.com/kyrgyz/articles/cl54q51051eo