Turmush - Баткен райондук жарандык абалдын актыларын каттоо бөлүмүндө коррупция бар деп мага көп кайрылышат, деп билдирди Жогорку Кеңештин депутаты Карамат Орозова Баткендеги жолугушууда.
«Мага кат менен кайрылгандардын көпчүлүгү жарандык абалдын актыларын каттоо бөлүмүндө коррупция бар экендигин айтышат. Ошондой эле балдарына туулгандыгы тууралуу күбөлүк ала албагандар кайрылат. Себеби кээ биринин нике күбөлүгү жок болсо, айрым учурда балдарынын атасы башка жакта болгондуктан керектүү документтерди чогултуу узакка созулуп кетет. Күбөлүк ала албагандар көп катталууда. Туулгандыгы тууралуу күбөлүк төрөтканадан берилсе бул көйгөй чечилмек», - деди К.Орозова.
Райондор аралык эмгек жана социалдык өнүктүрүү башкармалыгынын башчысы Авазбек Мамадаминовдун айтымында, сүйүнчү пул алгандар эки жакка чуркап кыйналып жатышат. Анткени сүйүнчү пул алуу үчүн документтерди жарандык абалдын актыларын каттоо бөлүмүнө тапшырып, акчаны райондор аралык эмгек жана социалдык өнүгүү башкармалыгынан алышат.
«Ал жакта кезек күткөн адамдар көп. Сүйүнчү пулун ала албай жүргөндөр да бар. Бизге үстүбүздөгү жылдын 31-августуна чейин ушул система менен иштейсиңер деп айтышкан. Сүйүнчү пулга документтерди тапшыруу жана акчаны алууну райондор аралык эмгек жана социалдык өнүгүү башкармалыгына өткөрүп берүүнү сунуштаганбыз», - деди ал
Ал эми Баткен райондук жарандык абалдын актыларын каттоо бөлүмүнүн башчысы Айгерим Шакеева: «Үстүбүздөгү жылдын 6 айында сүйүнчү пул алууга 993 адам катталса, 3050 балага туулгандыгы тууралуу күбөлүк берилген. Учурда аталган бөлүмдө эч кандай коррупциялык иштер боло элек. Бул бөлүмдүн башчысы кызматына 17-апрелде келдим, атайын буйрук 12-апрелде чыккан. Эмгек өргүүдүн 4-июлда келдим. Бул аралыкта эч кандай коррупциялык көрүнүш болгонун байкаган жокмун», - деди.
Буга чейин Баткен райондук жарандык абалдын актыларын каттоо бөлүмүнүн башчысы кызматында Гүлмира Омошева иштеген.
http://batken.turmush.kg/news:350009