Turmush -
Кечээ, 5-августта Кадамжай районунун А.Орозбеков айыл аймагына караштуу
Кара-Кечүү айылында 600 орундуу мечиттин курулушуна капсула салынды. Иш-чарага
айыл аймактагы имамдар, аксакалдар жана жаштар катышты, деп билдирди аймактык
кабарчы.
Мечиттин имамы Айбек Сариевдин айтымында, курулушка
жергиликтүү тургундар демөөрчүлүк кылып жатат.
«Мечитти жаңыдан куруу демилгесин жаштар көтөрүп чыкты. Буга
чейин эски мечит 200 орундуу болуп, 1994-жылы ашар жолу менен курулган. Бул
мечит А.Орозбеков айыл аймагында союз тарагандан кийин алгачкы курулган мечит
болгондуктан борбордук мечит катары пайдаланылып келген. Акыркы жылдары элдин
саны өскөндүгүнө байланыштуу адамдар мечитке батпай калган учурлар көп болгон.
Анын негизинде эски мечит бузулуп, ордуна жаңы, заманбап мечит курулууда», -
дейт А.Сариев.
Ошондой эле ушул эле
айылда жаштардын демилгеси менен курулуп жаткан волейбол ойноочу аянтчанын
курулушу аягына чыгып калды. Аянтча Аймактарды өнүктүрүү жылына карата курулуп
жатат.
Курулуш иштерине кеткен 600 миң сомго жакын каражатты
айылдагы жаштар каржылоодо. Ошондой эле былтыр аталган аймакка 3 млн 600 миң
сомго футбол аянтчасы курулган болчу.
Айылда буга чейин волейбол аянтчасы болгон эмес. Ал айылдагы
жаштарды спортко тартуу, кылмыштуулуктан арылтуу жана дени сак жаштарды өстүрүү
максатында курулуп жатат.
«Бул аянтчалар мурда жеке менчикке өтүп кетүү коркунучунда
турган. Бирок айыл жаштары бул маселеге өзгөчө көңүл буруп, жерди элге алып
калган. Андан кийин жаштардын демилгеси менен заманбап спорттук жайлар курула
баштады. Учурда жуунучу жай, дарааткана курулду. Ошондой эле балдар аянтчасы да
курулат. Келечекте спорт комплекс куруу да пландалган. Элдин спортко болгон
мындай аракети жаштарга стимул болуп, жаштар арасында спортко болгон кызыгуу артты.
Бул жерден мамлекеттин желегин чет өлкөлөрдө бийик көтөргөн спортчулар чыгат
деген үмүттөбүз», - деди жашоочулар
http://batken.turmush.kg/news:350081/?from=kg_turmush&place=newstoplast