Бүгүн, 21-сентябрда Ош эл аралык аэропортунан грек-рим күрөшү боюнча жаштар арасында өткөн Дүйнө чемпионатынан байгелүү кайткан Акжол Махмудовдуэл тосуп алды. Бул тууралуу калаа мэриясынан билдиришти.
Салтанатуу иш-чарага Ош шаарынын вице-мэри Нурбек Кадыров, Шаардык дене тарбия жана спорт комитетинин төрагасы Кылычбек Саркарбаев, спортчунун жакындары жана калаанын тургундары катышты.
"Акжол Махмудов менен кошо бир учакта Жогорку Кеңештин депутаттары, дин аалымы Чубак ажы Жалилов келген экен. Алар чогуу чыгышып Төрөбай Зулпукаров менен Чубак Ажы Жалилов балбандын колун кысып алкоо сөзүн айтышты. Небересин тосуп алууга балбандын чоң атасы да келген. Ал эми шаар жетекчилери Махмудовду медалы менен куттуктап, калпак, чепкен кийгизишти", — деп айтылат маалыматта.
Эскерте кетсек, Словакиянын Трнава шаарында өтүп жаткан жаштар арасындагы күрөш боюнча дүйнө чемпионатында Акжол Махмудов 18-сентябрда коло байгеге ээ болгон. Ага чейин Азия оюндарында күчүн сынап күмүш медаль тагынган.
Дагы: https://sputnik.kg/society/20180921/1041203714/oshto-akzhol-mahmudovdu-tosup-alyshty.html