Ош шаарындагы “Тынчтык” соода борбору 3 жылдан бери таштандыга акы төлөбөй келет. Тазалык мекемесинин адистери барып, келишим түзүп, таштанды үчүн акы төлөөсү керек экендигин айтса, соода борбордун жетекчиси анын аймагынан таштанды чыкпаганын, чыкса да аны өрттөп жаткандыгын айтат.
“Үч жылдан бери Ош-Тазалык ишканасы “Тынчтык” соода борборунун жетекчиси менен келишим түзө албайбыз. Биз жактан эч кандай таштанды чыкпаса эмнеге таштанды үчүн акы төлөшүм керек деп макул болбой жүрөт. Такыр эле таштанды чыгарбайм деген сөзү үчүн атайын акмалап жүрүп, жакынкы таштанды контейнерине акыр-чикирлерди салып жаткан базар кызматкерлерин көрүп калып, мэрияга АКТ түзүп жонотконбүз”,- деди Ош-Тазалык ишканасынын абоненттик бөлүмүнүн башчысы Мирлан Дуйшонаалы уулу.
“Тынчтык” соода борборунда конфет, печенье, кургатылган мөмө-жемиштер жана башка тамак-аш азыктары сатылат. Ал эми анын жанында эле тамактануучу ашканалары, пирожки бышыруучу жайлары бар. Анан алардан кантип таштанды чыкпай койсун? Тамак-аш калдыктарын кантип өрттөмөк эле?”,-дешет адистер.
Аталган соода борбордо азык-түлүк саткан дүкөндөрдөн сырткары ижарада турган ишканалар да бар. Алар ар бири ижара акысын төлөгөнү үчүн Ош-Тазалык ишканасына төлөнчү акчаны борбор жетекчиси төлөшү керек. Же болбосо, ар бир ижарачынын өзүнө милдеттендирге келишим түзүлүшү керек эле.
Аяна Бердигулова, РИВ "Взгляд" Ош