Кыргыз Республикасынын ички иштер министрлиги жана министр Улан Исраилов элдин үнү жетип, министр ал менен эсептешсе жакшы болмок. Мындай пикирин Базар-Коргон районундагы “Элим-жерим” коомдук бирикмесинин төрагасы Нурлан Рахматов билдирди.
Анын айтымында, ИИМ Жалал-Абад облусунун ички иштер башкармалыгынын башчысы Жеңиш Жоробековду кызматтан алып койгону эл үчүн жагымсыз кабар болгон.
“Эл менен биригип, эл арасында элдик жетекчи болуп иштеп жаткан адамдын кызматтан алынышы жөнөкөй эл үчүн өкүнүчтүү көрүнүш болду. Биздин коомдук бирикме 2013-жылдан тарта облустук ички иштер башкармалыгы жана анын жетекчиси Жоробеков менен тыгыз кызматташып келдик. Облустук милициянын жетекчисинин жөнөкөйлүгүнүн арты менен Жалал-Абад милициясынын кадыры бир топко көтөрүлдү. Алар эл менен бир болуп иштеп жатышат. Коомдук тартипти гана көзөмөлдөбөстөн, кылмыштуулуктун алдын алууда, аны болтурбоодо обочо кадамдарды жасады. Элди спортко тартып, жаштар, ардагерлер, окуучулар арасында түрдүү спорттук иш чараларды, ал тургай жергиликтүү бийлик жасачу иштерди да бөлбөй аткарып келди. Мындай жөнөкөй адам, ишбилги жетекчи ар дайым эле жарала бербейт”,- деди Рахматов.
Ошондой эле ал өз сөзүндө, Жоробеков өткөн жылы Аксыда болгон чек ара көйгөйүн өз убагында жөнгө салганын айтып, эки элдин ортосунда жаралып кетчү уруштун алдын алганын кошумчалады.
“Элим-жерим” коомдук бирикмесинин төрагасынын мындагы пикирин улай эле Базар-Коргон айылдык кеңешинин төрагасы Бакытбек Көчөров редакцияга келип, Жоробековдун кызматтан алынышы тууралуу төмөндөгүдөй пикирин билдирди.
“Бул кишинин кызматтан алынганын угуп кабатырга түшүп турам. Анткени, элге маалым болгондой Базар-Коргон көп улуттуу аймак. Ал жерде түрдүү кырдаалдар да жаралуусу мүмкүн. Бирок, аны жөнгө салып, эки элдин ынтымагын бекемдеп, коопсуздукту сактап турган жетекчи Жоробеков. Буга чейин бул кызматта көптөгөн инсандар иштеп кеткен, тилекке каршы алардын иши менен Жоробековдун ишин салыштырганда ат менен төөдөй айырма берет. А ИИМ болсо мындай кызматкерди иштен алганы коомчулуктан милицияга болгон ишенимин төмөндөтөөрү анык”,- дейт Көчөров.
Эске салсак, өткөн жылы Унгар-Тоодогу РРС-24 радиостанциясынын кызматкерлерин Өзбекстан барымтага алганда облустук милициянын башчысы Ж.Жоробековдун Өзбек тарап менен дипломатиялык сүйлөшүүлөрүнүн натыйжасында барымтага алынган Кыргыз жарандары Кыргызстанга кайтарылган