Токтогул суу сактагычындагы суунун запасы 2022-жылдын апрелине чейин «өлүк көлөмүнө» тагыраак айтканда, 5.5 млрд кубометрге жакындап калышы мүмкүн. Бул тууралуу Улуттук энергохолдингдин башкармалыгынын төрагасы Талайбек Байгазиев күз-кыш мезгилине даярдык боюнча өткөн жыйында билдирди.
Ал белгилегендей, 6-сентябрга карата Токтогул суу сактагычындагы суунун көлөмү 12 млрд кубометрди түзөт, бул өткөн жылдын ушул мезгилине салыштырмалуу 2.9 млрд кубометрге аз.
Байгазиевдин айтымында, Казакстан, Өзбекстан жана Түркмөнстандан электр энергиясын алуу менен маселе чечилбейт. Божомолдорго ылайык, быйыл суунун агып кирүүсүнүн көлөмү 8.4 млрд кубометрди түзөт же көп жылдык орточо нормадан 88%ды түзөт. Башка өлкөлөрдөн алынган электр энергиясын эске алганда, 1-октябрга карата Токтогул суу сактагычындагы суунун көлөмү 12.3 млрд кубометр, бул дагы 2020-жылдын тийиштүү мезгилине салыштырмалуу 2.9 млрд кубометрге аз.
«Буга байланыштуу келерки жылдын 1-апрелине чейин Токтогул суу сактагычындагы суунун болжолдонгон көлөмү 8.8 млрд кубометрди түзүшү мүмкүн, бул гидроэнергетикалык жабдуулардын коопсуз иштеши үчүн сунушталган минималдуу көлөмдөн 0.9 млрд кубометрге төмөн», – деп кошумчалады ал.
Улуттук энергохолдингдин башчысы электр энергиясын керектөөнүн тынымсыз өсүшү 2022-жылдын 1-апрелине чейин Токтогул суу сактагычындагы суунун көлөмү «өлүк көлөмгө» жакындап, 6 млрд кубометрди түзүшү мүмкүн экенин баса белгиледи.
Анын айтымында, күз-кыш мезгилдери ийгиликтүү өтүшү үчүн кошумча чара катары Бишкек ЖЭБиндеги электр жүктөмүн 480 МВтка чейин жогорулатуу, Борбор Азия өлкөлөрүнөн жана чакан ГЭСтерден электр энергиясын кошумча сатып алуу маселелери каралууда. Мындан тышкары, керектөөчүлөрдү газга жана жылытуунун башка түрлөрүнө өткөрүү боюнча иштер жүрүп, калк арасында түшүндүрүү иштери жүргүзүлүүдө.