Анда Гутерриш Жапаров менен учурашып жатып Кыргызстан менен өзгөчө байланышы бар экенин, анткени ал өлкөгө БУУнун баш катчысы катары гана эмес, башка макамда бир нече жолу баргандыгын белгиледи. Баш катчы Кыргызстан туруктуу өнүгүү максаттарына жетүү маселелери боюнча жакшы иштерди жүргүзүп жатканын баса белгилеп, бул багытта биргелешкен иштерди улантууга даяр экенине токтолгон.
"Антониу Гутерриш Садыр Жапаровго тоо экосистемаларын коргоо боюнча демилгелери үчүн ыраазычылык билдирип, бул көйгөйдүн маанилүүлүгүн айтты. Ал ошондой эле БУУ Кыргызстанга керектүү колдоо көрсөтүүгө даяр экенин баса белгиледи", — деп айтылат маалыматта.
Президент Жапаров Кыргызстан БУУнун баш катчысынын жеке көңүл буруусун жогору баалай турганын белгилеп, өлкөгө көрсөткөн көмөгү үчүн чын дилинен ыраазычылык билдирди.
"Мамлекет башчысы аймактык жана эл аралык кызматташтыкты бекемдөө Кыргызстандын келечекке болгон көз карашынын негизги элементи экенин белгиледи. Ал жаңы геосаясий шартта Борбор Азиянын ролу жана мааниси эселеп күчөп жатканына басым жасады. Андыктан аймактагы өлкөлөр менен кызматташууну бекемдөө ― Кыргызстан үчүн эң жогорку артыкчылыкка ээ экени айтылды", — деп жазылат маалыматта.
Жапаров Өзбекстан менен мамлекеттик чек ара боюнча келишимге кол коюу жана Тажикстан менен сүйлөшүүлөрдү жүргүзүү аймактык талаштарды чечүүдө жана тынчтык кызматташтыкты өнүктүрүүдө маанилүү кадам экенин баса белгиледи.
Мындан тышкары, Өзбекстан жана Кытай менен бирге темир жол куруу долбоору аймактын инфраструктурасын жана транспорттук байланыштарын өнүктүрүү үчүн чоң мааниге ээ.
Президент Кыргызстанда 2030-жылга чейин туруктуу өнүктүрүү максаттарын ишке ашыруу боюнча иштер активдүү жүрүп жатканын өзгөчө белгиледи.
Бул контекстте мамлекет башчысы Кыргызстан туруктуу өнүгүү боюнча эл аралык рейтингдерде жогорку орунду ээлей турганын билдирип, бирок иш аягына чыга электигин моюнга алды. Садыр Жапаров климаттын өзгөрүшү, айлана-чөйрөнү коргоо жана биологиялык ар түрдүүлүк жаатында кызматташууну бекемдөө боюнча Кыргызстандын активдүү иштерин дагы бир жолу өзгөчө белгиледи.
Баарлашуу учурунда президент Кыргызстан өнүгүп келе жаткан өлкөлөрдүн карыз жүгүн азайтуу боюнча демилгелерди колдой турганын, ошондой эле эл аралык коомчулукту тышкы карызды "жашыл" демилгелер менен алмаштырууга чакырарын айтты.
Жыйынтыгында тараптар тынчтыкты, туруктуулукту жана коопсуздукту камсыздоого багытталган аракеттерди мындан ары да колдоого даяр экендигин ырасташты.
Источник: https://sputnik.kg/20230921/zhaparov-antoniu-guterrish-menen-zholugushtu-1078781921.html