РФ лидерине кыргызстандык эксперт, "Аппликата" стратегиялык чечимдер борборунун аткаруучу директору Кубат Рахимов суроо берген. Ал Россия, Казакстан жана Өзбекстан түзгөн газ союзунун ийгилигин белгилеп, Борбор Азияда олуттуу көйгөйгө айланып бара жаткан суу жана энергетика маселесине токтолгон. Рахимов РФ лидеринен "суу жана энергетика союздарын түзүүгө жана куралдуу жаңжалдар менен социалдык туруксуздукту алдын алуу үчүн Россиянын модератор болуусуна кандай карайсыз?" деп собол салган.
Путин Россия буга чейин Борбор Азияга газ жеткирип көрбөгөнүн, совет мезгилинде, тескерисинче, Борбор Азиядан эки түтүк аркылуу жөнөтүлүп келгенин белгиледи.
"Азыр Борбор Азиядагы досторубуздун экономикасынын өсүшү жана жалпы климаттын өзгөрүшү менен аталган мамлекеттер Россиядан газ алуу ниетин билдиришти. Бул маселени биргеликте иштеп чыктык. Казакстан да, Өзбекстан да түтүк системасынын өз бөлүгүн калыбына келтиришти. "Газпром" эми Россиянын аймагында айрым техникалык мүмкүнчүлүктөрдү азыркыга ыңгайлаштырышы керек. Техникалык жактан иштер аткарылды, октябрда чакан көлөмдө газ жөнөтүлө баштайт. Бара-бара көбөйтөбүз", — деди Путин.
РФ президенти энергетика, суу маселесин чечүүдө экология көз жаздымда калбашы керектигин белгиледи.
"Энергетика, суу — мунун баары экономикалык жана финансылык жактан татаал болгону менен чечиле турчу маселелер. Албетте, экология унутта калбашы керек. Бул маселелердин баары биздин жадыбызда, Кыргызстан менен да сүйлөшүлүп келет. Иштеп жатабыз. Премьер-министр менен да дайым талкуулап келебиз. Жакында КМШ саммити өтөт, ал жактан да жолугабыз деген үмүттөмүн. Баары күн тартибиндеги маселелер, Борбор Азия мамлекеттери үчүн олуттуу мааниге ээ экенин түшүнөбүз", — деди өлкө башчы.
Эскерте кетсек, "Валдай" эл аралык дискуссиялык клубунун жыйыны 2-5-октябрь күндөрү Сочи шаарында өттү. Быйыл талкуу "Адилеттүү көп кырдуулук: жалпы коопсуздукту жана өнүгүүнү кантип камсыздаса болот?" деген темада уюштурулган.
"Валдай” эл аралык дискуссиялык клубу — саясат таануу, экономика, тарых, эл аралык мамилелер жаатындагы россиялык жана чет өлкөлүк алдыңкы эксперттердин бирикмеси. Клуб 2004-жылдын сентябрында РИА Новости агенттиги, Тышкы жана коргоо саясаты кеңеши, Moscow Times гезити, Russia Profile жана "Россия в глобальной политике” журналынын демилгеси менен түзүлгөн.
Источник: https://sputnik.kg/20231006/-borbor-aziyada-suu-zhana-ehnergetika-soyuzdaryn-tuzuu-1079176323.html