Кыргызстанда өкмөт улгайган адамдарга көңүл буруунун бир айлыгын жарыялады. Анын алкагында жергиликтүү жана борбордук бийлик органдары карылар үйлөрүндө жана ардагерлерге арналган өздөрүнүн иш-чараларын өткөрүүдө.
1-октябрь Эл аралык Карылар күнү менен 100 жаштан жогорку энелерди Баткен облусунун жетекчилиги да куттуктады.
Алгачкы иш-чара Баткен районуна караштуу Бужум айылынан башталды. Бужум айылынын тургуну 1911-жылы туулган учурда 105 жаштагы Зара Турсуматова апаны майрамы менен куттуктап, КРдин Баткен облусундагы ыйгарым укуктуу өкүлүнүн орун басары Алишер Абдрахманов, Баткен районунун акиминин орун басары Кишимжан Кыдырова, Кара-Булак айыл өкмөтүнүн башчысы жана жергиликтүү жеке ишкерлер барышты. Жетекчилик КР Президенти Алмазбек Атамбаевдин атынан 10 миң сом, Баткен облусунун атынан 2 миң сом, райондун акими 3 миң сом, социалдык фонд башкармалыгы 1 миң сом жана жеке ишкер 5 миң сом акчалай сыйлыктарын жана айыл өкмөт тарабынан шириндиктерди тапшырышты.
Турсуматова Зара апа учурду 105 жашта жалгыз кызы бүгүнкү күндө 80 жашта. Келген жетекчиликке Зара апа ыраазычылыгын билдирип, батасын берди.
Андан соң жетекчилик ушундай эле иш-чара менен Баткен районуна караштуу Кыштут айыл өкмөтүнүн Кыштут айылында болушуп, 1912-жылы туулган Саадат Садыкованы майрамы менен куттуктап акчалай сыйлыктарын тапшырышты. С.Садыкова учурда 5 кыз 1 уулдун, 65 неберенин 105 чеберенин 2 кыбыранын кадырлуу энеси.
Андан кийинки энелерди куттуктоо иш-чарасы Самаркандек айылында улантылып, ага КР Өкмөтүнүн Баткен облусундагы ыйгарым укуктуу өкүлүнүн орун басары С.Абдырахманов жетектеген делегация катышып, Самаркандек айылынын тургуну 1914-жылы туулган
Зайнап Турдукулованы куттукташты. Жетекчилик КР Президенти Алмазбек Атамбаевдин атынан 10 миң сом, Баткен облусунун атынан 2 миң сом, райондун акими 3 миң сом, социалдык фонд башкармалыгы 1 миң сомдон, Самаркандек айыл өкмөтүнүн башчысы Зайнап апаны куттуктап айыл өкмөт атынан 2 миң сом акчалай колдоо беришти.
Аталган делегация ушундай эле иш-чараны Дара айыл өкмөтүнө караштуу Кан айылында да өткөрүп, айылдын 100 жаштагы тургуну Кенжеева Үрү апаны куттукташты. Үрү апанын 5 кыз, 1 уулу, 32 небереси жана 38 чебереси бар.