Скандинавиялык Тelia Company ири байланыш оператору тажик бийлигине кат жолдоп, Тажикстандагы Tcell туунду компаниясынын маселесин чечүүгө жардам сурады.
Компания былтыр сентябрда Ага Хан Экономикалык Фонду менен Central Asian Telecommunications Development B.V компаниясынын (Tcell бренди) бир үлүшүн сатуу боюнча макулдашууга жетишкенин, бирок бул келишим Тажикстандын Монополияга каршы агенттиги тарабынан бекитилбей жатканын билдирген.
Катта Tcell компаниясына карата мыйзамсыз салык доосу коюлуп жатканы, бул байланыш операторун оор каржылык абалга кептегени да белгиленген. Тelia Company коммерциялык директору Йохан Деннелинддин билдиришинче, «Точиктелеком» мамлекеттик байланыш оператору Tcell компаниясына карыздар. Компаниянын олуттуу каржылык кысымга кабылышы менен Тажикстандын телекоммуникациялык секторунун маанилүү бөлүгү коркунуч алдында.
Мындан улам Тelia Company бийликтен бардык мүмкүнчүлүктөрдү колдонуп, бул көйгөйдү чечип берүүгө жардам суроодо.
Тажикстандын Салык кызматы Tcell компаниясын салык төлөбөй жатат деп айтыптоодо. Карыз үчүн провайдерге 155 миллион сомони айыппул салынган.