Сузак районунун Октябрь аймактык үй-бүлөлүк дарыгерлер борборуна саламаттыкты сактоо министрлиги тарабынан операция жасоого ыңгайлашкан реаномобиль тез жардам унаасы берилди. "Тойота” үлгүсүндөгү заманбап бул унаанын аталган борборго берилишине башкы себепкер Сузактык жеке ишкер Гүлжигит Жумаев болгон. Бул тууралуу маалыматты аталган үй-бүлөлүк дарыгерлер борборунун жетекчиси Сыяда Кадыралиева билдирди.
Айтымында көп зарылчылыкты жараткан мындай унааларды Япон мамлекетинен Кыргызстанга алып келүү каражаттарын Гүлжигит Жумаев көтөргөн.
"Өзүбүздүн уулубуз Япониядан реаномобиль унаасын алып келүүгө көмөк көрсөтүп, анын бирин биздин аймакка берилүүсүнө себепчи болду. Мунун менен бизди бир топ кыйынчылыктан чыгарды десем болот”, - деди С.Кадыралиева.
Ал эми Гүлжигит Жумаевдин белгилөөсүндө унааны Япониядан алып келүүдө башкы шарт унаалардын бирин Октябрь аймагына алып келүү болгон.
"Жогоруда аталган мамлекеттен 2 реаномобиль унаасын алып келүү каражаттарын көтөрүп, бирин Октябрь аймагына берүүлөрүн сурандым. Анткени 6 айыл өкмөттү камсыздаган бул аймакта тез жардам унаасынын жетишсиздиги башкы көйгөй болуп келгени чындык”, - дейт ишкер.
Белгилей кетсек, мындагы тез жардам унаасы 67 миң калкка кызмат көрсөтөт. Октябрдагы үй-бүлөлүк дарыгерлер борборунда буга чейин 3 унаа болгон. Бирок алардын техникалык абалы орто деңгээлде болгону үчүн кызматкерлерге бир топ кыйынчылыктарды жаратып келгенин борбордун жетекчиси белгиледи.