Баткен шаарында Баткен ишкерлер ассоциациясынын салтанаттуу ачылуу аземи болду.
Ачылышка КР Өкмөтүнүн Баткен облусундагы ыйгарым укуктуу өкүлү Абиш Халмурзаев, Баткен шаарынын мэри Гапарали Матказиев, “Шоро” компаниясынын башкы директору Жумадил Эгембердиев жана ЖИА бизнес ассоциациясынын өкүлдөрү, жеке ишкерлер катышты.
Уюштуруучулардын маалыматы боюнча жаңы ачылып жаткан ишкерлер ассоциациясынын негизги максаты региондогу ишкердикти өнүктүрүү жана ишкерлердин кызыкчылыгын коргоо. Ассоциация ишкерлердин башын бириктирүү менен ишкердик багытында жаңы мүмкүнчүлүктөрдү сунуштоо, региондогу ишкердик жана инвестициялык абалды жакшыртуу, мамлекеттик органдар менен ишкерлердин ортосунда көпүрө болуу. Эл аралык жана ички соода, экономикалык мамилении чыңдоо багытында иш алып барат.
Иш – чаранын алкагында облус аймагында өндүрүлгөн продукциялардын жарманкеси уюштурулду. Жарманкеге сүт азыктары, өрүктүн түрлөрү жана кондитердик азыктар коюлду.
Облус жетекчиси А.Халмурзаев ачылуу аземи менен куттуктап, бул нерсе регионго жакшы саамалык болгондугун, ишкерлер, кичи жана орто бизнес аркылуу Баткен жергесинин экономикасы жогорулаарын, жаңы жумуш орундары, жаңы өндүрүштөр пайда болоорун, соода-сатык мамилеси көтөрүлөөрүн жана мындан ары облустун аймагындагы ишкерлерге ар тараптуу колдоо көрсөтүлөөрүн белгилеп кетти.