Жогорку Кеӊеште Коопсуздук кеӊешинин ишин жөнгө салууга багытталган «Кыргыз Республикасынын Коопсуздук кеңеши жөнүндө» мыйзам долбоору каралып, анын концепциясы добуш берүүгө жөнөтүлдү. Демилгечилер – депутаттар И.Өмүркулов, Ө.Бабанов, А.Карашев, А.Баатырбеков, М.Жеенчороев, К.Керезбеков.
Депутат Канат Керезбековдун айтымында, Коопсуздук кеңеши мамлекеттик бийлик органдарынын тутумундагы өлкөнүн улуттук коопсуздугун камсыз кылуу чөйрөсүндө бирдиктүү мамлекеттик саясатты жүргүзүүнү ишке ашырган конституциялык кеңешүүчү орган болушу керек. “Конституциялык реформага ылайык, Коргоо кеңешин Коопсуздук кеңеши деп кайра түзүү каралды”, - дейт ал.
Теориялык жана практикалык жагынан алганда, “улуттук коопсуздук” деген түшүнүк кыйла кеңири болуп саналат жана өлкөнү куралдуу коргоо маселелерин гана эмес, ошондой эле коомдун жана мамлекеттин жашап турушунун ар түрдүү чөйрөлөрүнүн коопсуздугун камсыз кылуу маселесин да өзүнө камтыйт. Ошондон улам, ушул мыйзам долбоору иштелип чыкты.
Ошону менен бирге, Коопсуздук кеңешинин курамын, түзүмүн жана уюштуруу тартибин кайра карап чыгуу сунуш кылынууда. Айтсак, Кыргыз Республикасынын Жогорку Кеңешинен Коопсуздук кеңешинин курамына кызматы боюнча Төрага, коргоо жана коопсуздук маселелерин тейлеген комитеттин төрагасы, ошондой эле парламенттик көпчүлүк коалициянын лидери жана саны боюнча мүчөлөрү көп оппозициялык фракциянын лидери кирет.
Коопсуздук кеңешинин ыкчам чечимдерди кабыл алууну талап кылган маселелерди талкуулай турган кезексиз жыйыны төраганын жетекчилиги алдында өтүп, Жогорку Кеңештин Төрагасы, Премьер-министр, Куралдуу Күчтөрдүн Башкы штабынын башчысы, Коопсуздук кеңешинин катчысы, ошондой эле тышкы иштер, ички иштер, өзгөчө кырдаалдар, улуттук коопсуздукту камсыз кылчу мамлекеттик органдардын жетекчилери катышат.
Депутат Алмазбек Токторов мыйзам долбоорунда Коопсуздук кеӊешинин курамы өзгөрүп жатканын белгилеп, мында ага парламенттик фракциялардын башчылары толугу менен кирсе, азыр көпүчүлүк коалициясынын жана оппозициялык фракциянын башчысы киргизилип калганынын себебин сурады. Баяндамачы бул азырынча демилгечилер тобунун сунушу гана экенин, ал экинчи окуу жүрүшүндө депутаттардын сунушу менен өзгөрүшү мүмкүн экенин билдирди.
Ал эми депутат Акылбек Жапаров Коопсуздук кеӊешинин курамына баардык парламенттик фракциялардын лидерлерин киргизүү, анын курамына кире турган орган жетекчилеринин ээлеген кызмат ордун мыйзамда так жазуу зарылдыгын баса белгиледи. Демилгечилер бул сунушту ойлонуп көрүүгө убада берди.
Белгилей кетсек, ушу тапта Жогорку Кеӊеште азыр иштеп жаткан Коргоо кеӊешинин аталышын Коопсуздук кеӊешине алмыштуруу боюнча мыйзам долбоору каралууда.
Булак: http://www.kenesh.kg/