Ошто таштанды салган челектен ымыркайдын денеси табылып, күнөөлүүлөр суракка алынууда.
Ош шаарынын Н. Байтемиров көчөсүндө коюлган таштанды челегинен ымыркайдын жансыз денеси табылган. Эртеси күнү эле Ош шаардык ички иштер башкармалыгынын кызматкерлери наристенин 22 жаштагы энесин кармашкан. Кармалган күкүк эне баланы боюнан алдырганын, андан соң оорукананын санитаркасына жерге коюп берүүгө өтүнгөнүн маалымдаган.
22 жаштагы келин никесиз кош бойлуу болуп калгандыктан боюнан алдырганын кошумчалаган.
“Ош областтык төрөт үйүнүн санитаркасына аял аборт жасаткандан кийин 500 сом берип, наристени көмүп берүүнү суранган, ал эми санитарка убадасына турбай, таштанды таштоочу челекке ыргытып салган”,- дейт Ош шаардык ички иштер башкармалыгынын басма сөз катчысы Замир Сыдыков.
“Учурда иликтөө иштери жүрүп жатат, эгерде соттук медициналык экспертизада ымыркай тирүү төрөлүп, өпкөсү менен дем алган деп далилденсе, анын апасы “адам өлтүрүү” беренеси менен сот жообуна тартылат. Баланын ушундай абалда калышына себепкерлердин баардыгы каралашкан катары суракка алынат”,- деп кошумчалады Замир Сыдыков.
Ал эми Ош областтык төрөт үйүнүн жетекчиси Гүлбара Кенжебаева, наристени таштандыга ыргыткан санитарка областтык төрөт үйүндө иштебейт деп билдирди.
Айтымында ал жеке медициналык борбордо санитарка болуп эмгектенет. Аборт жасаткан келин болсо өзү эмне кылаарын билбей ошол аялга кайрылган.
“Биздин мекемеге тиешеси жок, укук коргоо органдары бериштирип жатышат, кошумча маалымат берише элек”, - деди Кенжебаева.
Гүлбара Кенжебаеванын маалыматына ылайык, негизинен биологиялык субстанциялар (адам мүчөлөрүнүн калдыктары, чарчап калган, аборттон кийинки ымыркайлардын денелери) Оштогу Беккери чуңкуруна ташталат.
“Бирок көпчүлүк учурда колу буту чыгып калган наристелердин денеси мусулманча жерге берилсин деп, туугандарына сунушталат. Алар тил кат жазып беришип, анан алып кетип жерге беришет. Кээ бир учурда албайбыз дешсе патолог-анатомдорубуз денени залалсыздандырып, хлор чачып туруп, Беккери чуңкуруна ташташат”, - дейт Кенжебаева.
Саламаттыкты сактоо министрлигинин берген маалыматына ылайык, Кыргызстанда жылына 50 тоннадан ашык биологиялык калдыктар чыгат. Ал эми өлкө боюнча жылына 22 миңден ашык аборт жасалат, бул расмий катталгандары, ал эми эч кимге билгизбей, жеке менчик мекемелерде, үйлөрдө жашыруун аборт жасагандар да жок эмес.