Аксы районунда учурда коомдук абал тынч. Милиция кызматкерлери күчөтүлгөн тартипте иштеп жатат. Мындай маалыматты Жалал-Абад облустук ички иштер башкармалыгынын башчысы Жеңиш Жоробеков билдирди.

Маалыматка ылайык, райондо жергиликтүү тургундарга өз деңгээлинде түшүндүрүү иштери жүргүзүлүп жатат.
“Акыркы кездеги окуя боюнча Аксы районунун аймагында коомдук абал тынч. Жергиликтүү бийлик менен укук коргоо органдары район калкына түшүндүрүү иштерин жүргүзүүдө. Ички иштер министринин атайын буйругунун негизинде 25-августтан тарта милиция кызматкерлери күчөтүлгөн тартипте иштеп жатабыз”,-деди ОИИБдин жетекчиси.

Ж.Жоробеков өз сөзүндө 3-8-сентябрь аралыгында өтө турчу дүйнөлүк көчмөндөр оюну учурунда да Аксыда милиция өзгөчө күчөтүлгөн тартипте кызмат кылаарын кошумчалап, өзбек тарап барымтага алган кыргыз жарандарын бошотуу иштери мамлекеттик деңгээлде эки өлкөнүн ортосунда атайын түзүлгөн комиссия тарабынан чечилип жатканын билдирди.

Эске салсак, 23-августта Аксы районундагы Үңкүр-Тоодогу радиорелейлик станциясынын 4 кызматкерин өзбек тарап чек араны бузуп өткөн деген жүйөө менен камакка алган. Аталган күндөн бери 4 жаран тууралуу эч кандай маалыматтар аныктала элек.