БИШКЕК, 25-авг. — Sputnik. Астанада өтүп жаткан көк бөрү боюнча дүйнө чемпионатында кыргыз улакчылары бүгүн АКШнын командасы менен оюн таласына чыгат.

Эки өлкөнүн беттешин Sputnik Кыргызстан агенттиги тексттик трансляция аркылуу чагылдырат.

Оюндун төрт күндүк жыйынтыгы менен "А" тайпасында Кыргызстан лидерлик кылууда. Буга чейин Монголияны 4:0, Өзбекстанды 11:2, Түркияны 13:3, Тажикстанды 15:2 эсебинде утуп чыккан.

 

АКШ курама командасы Түркиядан 3:1, Монголиядан 10:4, Тажикстандан 9:2, Өзбекстандан 11:1 эсеби менен жеңилген.

 

Ал эми "Б" тайпасында казак командасы алдыда келе жатат. Буга чейин Афганистанды 9:2, Россияны 15:3, Кытайды 15:4 эсебинде жеңип алган. Азербайжан командасы чемпионатка келбей калгандыктан автоматтык түрдө казак улакчылары жеңүүчү деп табылган.

Эки тайпадан эң көп упай топтоп чыккан командалар 27-августта финалдык беттеште намыс талашат. Өз тайпасында чогулткан упайы менен экинчи сапка чыккан командалар үчүнчү орун үчүн күч сынашат.

Көк бөрү боюнча дүйнө чемпионатынын байге фондусу 18 миллион теңге (3,7 миллион сом). Үчүнчү орунга 2 миллион теңге (413 миң сом), экинчи орунга 5 миллион теңге (1 миллион 34 миң сом) коюлган. Ал эми баш байгени багындыргандар 10 миллион теңгеге (2 миллион 68 миң сом) ээ болот.