БИШКЕК, 12-фев. — Sputnik. Өз энеси депкир менен катуу сабаган бала 11-февраль күнү эс-учуна келбеген бойдон ооруканада көз жумду. Дарыгерлер ага мээси катуу жабыркап, акыреги сынып, бөйрөктөрү жанчылып калган деген диагноз коюшкан.

Тилекке каршы, бул балдардын өз тууганынын колунан ажал таап же оорукчан болуп калган биринчи учуру эмес.

Sputnik Кыргызстан агенттиги акыркы жылдары Кыргызстанда балдарга карата зордук-зомбулук боюнча жети мисалды эске салды.

 

1. 2013-жылдын март айы. Жалал-Абад облусунун 1,5 жаштагы тургуну Раяна өгөй атасынын зордук-зомбулугуна кабылган. Улам ыйлай берген наристени "сооротуш" үчүн апасынын күйөөсү башын ысык мешке тыгып, оттун үстүнө отургузган. Дагы бир нече күндөн кийин үйүнө мас келген өгөй ата ыйлап аткан кызын антенна менен сабап, эки жолу жакка чаап жиберген. Ошол убакта эсин жоготуп койгон наристе эсине келбеген бойдон чарчап калган. Өгөй ата өлүп калган наристени эч кимге айтпай көөмп койгон.

 

2. 2013-жылдын октябрь айы. Ак-Суу районунда жашаган эки жашар Диана булганып калган шымы үчүн сабалган. Таяктын уусуна чыдай албаган наристе комага түшүп калган. Анын жашоосу үчүн күрөшкөн дарыгерлер кичинекей денесиндеги көп сандаган сыныктарды, уюган канды көрүп таң калышкан. Наристе эс-учуна келбеген бойдон көз жумган.

3. 2014-жылдын август айы. Орловка шаары. "Сүйүктүү жар, мээримдүү эне жана үлгүлүү адам…" Кошуналары менен достору ал аялды ушинтип сүрөттөшкүн. Бирок анын депрессияда жүргөнүн эч ким билген эмес. Ошентип "мээримдүү" эне биринчи уулун муунтуп, экинчисин сууга чөктүрүп, бир заматта киши өлтүргүчкө айланган. Эмнеге деп сурашканда, "кыйкырып-өкүрүп ойношту" деп жооп берген.

4. 2015-жылдын февраль айы. Бишкектик мугалим өзүнүн Чыңгыз аттуу уулун жана Нурайым аттуу уулун бычактап салган. Аял балдары кийимин булгап алганына жини келип, ушундай кадамга барганын билдирген.

5. 2015-жылдын январь айы. Озерное айылынын кичинекей тургуну, эки жаштагы Ибрагим оор абалда ооруканага түшкөн. Катуу сабалган баланы зордуктап, денесине чылым басышкан деген божомолдор айтылган. Баланы "баккан" атасынын бир тууганы өмүр бою эркинен ажыратылып, жеңеси 15 жылга соттолгон.

 

6. 2015-жылдын декабрь айы. Каракол шаарында жашаган үч балалуу үй-бүлө. Эртең менен улууларын мектепке, кичүү кызын балдар бакчасына жеткирген ата-эне үйүнө кеч кайтышкан. Үйгө кирери менен жымжырттыкка таң калган атасы уктоочу бөлмөгө барып, өлтүрүлгөн кызы менен араң дем алып жаткан уулун таап алган. Бактыга жараша, дарыгерлер баланы сактап калышкан. Кийин балдарга бир тууган таякеси жездесинен өч алуу максатында кол салганы белгилүү болгон. Ал Бишкекке качып кеткенине карабай, милициянын колуна түшүп, өмүр бою эркинен ажыратылган.

 

7. 2017-жылдын декабрь айы. Интернетте кызыл куртка кийген адам өзүнүн жерге кулап кеткен кичине баласын ичке тепкен видео тараган. Кийин ал адам Мамкаттоо кызматында иштей турганы белгилүү болгон. Ага карата кылмыш иши козголуп, бирок баланын энеси жолдошуна доосу жок экенин билдирген. Сот ишти жабык деп жарыялаганы менен акыйкатчы чечимди кайра карап чыгууну талап кылып келет.

Sputnik Кыргызстан агенттигинин окурмандарына балдар психологу Айгүл Кызалакова бала тарбиялоо боюнча кеп-кеңешин берген. Адистин пикирине караганда, өсүп келе жаткан адамды кемсинтүү, жаман сөздөр менен тилдөө, ур-тепкиге алуу анын адам катары туура калыптарышына терс таасирин тийгизет.