Анын айтымында, мындай уюм ачуу боюнча көп жылдардан бери сөз болуп,
бирок ишке ашпай келген. Эми ачылып, сүрөтчүлөр кубанып турат.
«Буга чейин Москвада 18 жыл көркөм сүрөт тармагында белгилүү айкелчи,
сүрөтчүлөр Франгулян, Бланк сыяктуу инсандар менен иштештим. Акыркы 2
жылдан бери Апаз Жайнаков атындагы драма театрда башкы сүрөтчү болуп
эмгектенем.
Мен Москвадан келип, таң калдым. Сүрөтчүлөр мектеп интернаты болсо,
болгондо да Бишкектеги сүрөтчүлөр академиясынын алдындагы абройлуу окуу
жайдын бүтүрүүчүлөрү көп экен. Анан ошол коллегалар менен байланыштым.
Алыскы Лейлектин Арка өрөөнүндө Сайиткул Кудайкулов деген укмуш сүрөтчүбүз
бар экен. Кадамжайда, Сүлүктү, Кызыл-Кыяда ушундай мыкты коллегаларыбыз
жасаган эмгектерин көрсөтө албай же көргөзмө уюшулбай, ар кимибиз ар жакта
өз түйшүгүбүз менен болуп калган экенбиз. Натыйжада облустун аймагындагы
көркөм сүрөт өнөрпоздору менен эч кимдин иши болбой, чыгармачылык жаатта
чоң боштук жаралыптыр. Акыры баарыбыз бир пикирге келип, Бишкекке барып,
облустун атынан көркөм сүрөт көргөзмөсүн уюштуруп, сүрөтчүлөр союзун
түзүүнүн биринчи кадамын жасадык. Бизди сүрөтчүлөр союзунун төрагасы
Жакшыбек Жунушов жакшы кабыл алып, колдоду. Жакшы жардам көрсөттү.
Жыйынтыгында көргөзмөбүз ийгиликтүү өтүп, Баткендин 10 көркөм сүрөт чебери
Кыргызстандын сүрөтчүлөр союзуна мүчө болду. Эң ириде жаштарга колдоо
көрсөтөбүз. Колдоо көрсөтүп, сүрөт мектеп интернатын ачып бергендиги үчүн
Тургунбай Садыков агабызга рахмат.
Башка облустарда сүрөтчүлөр «Эл сүрөтчүсү», «Эмгек сиңирген сүрөтчү» деген
наамдарды алышкан. А бизде мыкты сүрөтчүлөр бар экенине карабастан
наамдары жок. Бул ойлоно турган маселе.
Алдыдагы пландар жөнүндө айтсам, бир эле сүрөтчүлүк, айкелчиликте эмес,
зергерчилик, элдик чеберчилик, килемчилик, айтор кыргыздын улуттук
баалуулуктарынын баарын өнүктүрөбүз. Өзүңүз билесиз, Баткенде башка
аймактарга окшобогон уникалдуу өзгөчөлүктөрү бар. Бир эле килемчилик менен
чеберчиликтеги өзгөчөлүктөрүбүздү дүйнө эли баалап жатканы менен биз андан ары чебер кыздарыбызга, айымдарыбызга дем-күч, стимул бере албай
жатпайбызбы. Алар кандай гана чоң өнөр ээлери экендигине карабастан калып
калууда. Көп аракеттерди чыгармачылык дараметибиз менен көрсөтөбүз деген
ойдомун», - деди ал.
Источник: https://batken.turmush.kg/news:481275