Ош шаарында мугалимдер административдик ресурсту пайдаланып, 18 жашка толо элек студенттерди аянтка партиянын жолугушуусуна алып келген. Бул тууралуу ШИИБдин басма сөз кызматы билдирди.
Кечээ, 4-ноябрда борбордук аянтка Ош мамлекеттик университетинин педагогика факультетинин студенттери өз эркинен сырткары үгүт иштери үчүн митингге алынып келингендиги тууралуу маалыматтар жарык көргөн. Бул маалыматты текшерүү үчүн митингге катышкан студенттер менен мугалимдер Ош шаардык ички иштер башкармалыгына алынып келинген. Студенттердин баарынын жашы 18ге толо элек, паспорт ала элек.
«Алар көрсөтмөлөрүндө айрым агайлары "экскурсияга барабыз" деп алдап, Ош шаарынын борбордук аянтына "Азаттык" партиясынын митингине алып келгендигин айтышты. Жалпысынан 8 мугалим, 15 студент суралды. Тергөөнүн жүрүшүндө аталган окуу жайдын мугалимдери өз студенттерин буйрук жана алдоо жолу менен борбордук аянтка алып келгендиги аныкталды. Бул факт боюнча Жоруктар жөнүндө кодекстин 87-1-беренесинин 2-бөлүгүнүн (административдик ресурсту кыянаттык менен пайдалануу) белгилери менен сотко чейинки өндүрүш иши ачылып, тергөө иштери аяктап калды. Жакынкы күндөрү соттук кароого берилет», - деп айтылат маалыматта.
---------------------------------------
Буга чейин Ош шаарынын борбордук аянтында партиялардын биринин үгүттөө ишине Ош мамлекеттик университетинин педагогика, психология жана дене тарбия факультетинин студенттери менен мугалимдери катышканы айтылган.
Студенттердин биринин айтымында, кечээ алар 6 саат сабак окушу керек болчу. Бирок мугалимдер студенттерди 2 сабактан кийин эле Ош шаарынын борбордук аянтына экскурсияга деп алып келип, үгүт иштерине катыштырган.
Ош мамлекеттик университетинен билдиришкендей, Ош мамлекеттик университетинин педагогика, психология жана дене тарбия факультетинин башталгыч билим берүүнүн теориясы жана методикасы кафедрасынын доцентинин милдетин аткаруучу Бекмурза Идаев жана ошол эле кафедранын окутуучусу Райымбек Жандозов 3-ноябрда Ош шаарынын борбордук аянтында саясий партиянын шайлоо өнөктүгүнө байланыштуу өткөрүлүп жаткан жолугушуусуна студенттерди алып баргандыгы үчүн сөгүш берилди. Ал эми факультеттин деканы Бакытбек Муратбаевге эскертүү берилди.
https://osh.turmush.kg/news:450154