DataLife Engine > Ош жаңылыктары > Ош шаарынын тургундары ипотекалык үйлөрдүн пайыз акчасын төмөндөтүүнү талап кылууда

Ош шаарынын тургундары ипотекалык үйлөрдүн пайыз акчасын төмөндөтүүнү талап кылууда

Азыр курулуп жаткан үйлөрүнүн чарчы метри 25 миң сомдон бааланууда. Ошондуктан биз бул айырмачылыктарды жок кылууну талап кылабыз. Бул тууралуу бүгүн, 27-январь күнү АКИпресс-Ошто өткөн маалымат жыйында Ош шаарынын тургундары билдиришти.

Алардын айтымында, Ош шаардык мэриясынын алгачкы ипотекалык батирлеринин баасы менен азыркы батирлеринин айырмасы чоң. Анын үстүнө пайызы да бар.

Шаар тургуну Талант Шаанов азыркы учурда Ош шаардык мэриясынын алдындагы жеке турак жай куруу, жер пайдалануу жана турак жай маселелери боюнча департаменти тарабынан ипотеканын 4 пайыздык ченине макулдук берүү боюнча кагазды жашоочуларга таркатып, кол койдуруп жатышканын айтты.

«Бизде азыркы учурда «ипотеканын 4 пайыздык ченине макулмун» деген тариздеги кагазга кол коюу өнөктүгү жүрүп жатат. Биз убагында мэриянын ипотекалык үйлөрүнөн алганбыз. Бирок түшүнбөй эле алган экенбиз. Анда биз чарчы метрин 32 миң сомдон ашык акчага алганбыз. Азыркы учурда мэриянын ипотекасынын чарчы метри 25 миң сомдон болуп жатат. Биздин талап — биздин ипотеканын баасын азыркы ипотеканын баасына теңдеп берүү же андагы 4 пайыздык үстөктү алып салуу керек», - деди Шаанов.

Шаардын дагы бир тургуну Нурила Исаева жалгыз бой энелер, мугалимдер, социалдык жактан камсыз эмес үй-бүлөлөр ипотеканын акчасын төлөй албай кыйналып жатышканын белгиледи.

«Жалгыз бой энелер, мугалимдер, көп балалуулар, социалдык жактан аз камсыз болгон үй-бүлөлөр муруңку ипотеканы төлөй албай жатышат. Азыр насыяга телефон да ала албай калдык. Башында батирлерге кирип жашаганыбыз менен келишимди кийин беришкен. Ошондуктан чарчы метрин канчадан алганыбызды билбей калганбыз. Мына ошол себептен ипотеканын негизги баасын же пайызын төмөндөтүп берүүнү суранып жатабыз», - деди Исаева.

Шаардагы ипотекалык көп кабаттуу үйлөрдүн биринин үй комитетинин башчысы Апиза Рахманова алар жашаган батирлердин сапаты да начар экенин билдирди.

«Үйдүн чатырынан жер төлөсүнө чейин сапатсыз болуп калган. Түнкү чырактар тез-тез күйүп турат. Аны алмаштырабыз. Жер төлөсү баткак. Балдар ойной турган аянтча жок. Үйүбүздүн жанынан унаа жолу өткөн, балдарыбызды жалгыз көчөгө чыгара албайбыз», - деди Рахманова.

Ош шаардык мэриясынын алдындагы жеке турак жай куруу, жер пайдалануу жана турак жай маселелери боюнча департаментинин башчысы Кутманалы Абдырахман уулу айтылган дооматтар боюнча жооп берди.

«Жалпы 1 миң 504 адам ипотекага кезекте турат. Алар өздөрүнө качан кезек тиери боюнча кызыгышат да. Ошондуктан аларга «ипотеканын 4 пайызы жокко чыгарылса, силерге кезек жетпей, көп кабаттуу үйлөр курулбай калышы мүмкүн» деп түшүндүрүп жатабыз. Анткени ипотеканын 4 пайызы жокко чыгарылса, ипотекалык программа узак жашай албайт. Барып-барып токтоп калат. Жоюлуп кетет. Ошондуктан алар ипотеканын 4 пайызы жоюлбасын деп кол коюп берип жатышат. Аларды мажбурлап жаткан жокпуз», - деди ал.

скачать dle 11.0фильмы бесплатно



Вернуться назад