Ысымы өлкөгө белгилүү болуп жаткан окуучу Токтогул районуна караштуу Үч-Терек айыл аймагынын кулуну, 5 бир тууган. Аймактык кабарчы алдыңкы бүтүрүүчүнү маекке тартты.
- Элдияр, алгач кубанычыңды тең бөлүшөбүз. Адегенде ушул тестирлөөнүн жыйынтыгын кимден уктуң жана кубанычыңды биринчи ким менен бөлүштүң?
- Ата-энемдин жүзүн жер каратпайын деп жакшы окуганга тырышчумун. Дайыма жакшы жыйынтыктарды көрсөткүм келчү, анын ичинде ушул алтын сертификатка ээ болууну да эңсечүмүн. Алтын сертификатка ээ болуу максатым орундалып, дале кубанып, толкунданып жүрөм. Токтогул районунда айылда жүргөм, класс жетекчим байланышып, кубанып куттуктады. Угар замат биринчи атама чуркап барып сүйүнчүлөдүм. Атам бекем кучактап: «Мен сенден күткөм. Сен аракет кылып жаткансың», - деп өзгөчө сүйүндү. Апам тирүү болгондо башкаларга окшоп, ийгилигимди ага биринчи сүйүнчүлөмөкмүн. Апам 3 жыл мурун оорудан улам кайтыш болгон. Бир туугандарымдын, атамдын кубанычтары мага мотивация берди. Дагы чоң ийгиликтерге жетишип, аларды дагы сүйүндүргүм келип жатат.
- Тестирлөөгө канча убакыт даярдандың?
- Былтыркы жылдан тарта даярданып баштагам. Биздин лицейде атайын шарттар түзүлгөн. Курстар өтүлөт, тестирлөөгө даярдап башташат. Эжей-агайлар сунуштарын, багыттарын айтышып, бизди катуу даярдашты. Сынакка чейин башка тесттерди толтуруп, андан кетирген кемчиликтеримдин, жетишпеген темалардын үстүндө иштедим. Уюлдук телефондон, интернеттен алысыраак болдук. 1 жылдык даярдануу мен үчүн аз убакыттай сезилип жүрдү.
- Сынакка кирдиң. Ошондо сен үчүн суроолор кандай болду? Жогорку упай аларыңа ишеним болдубу?
- Тест учурунда толкундануу деле болгон жок. Буга чейин олимпиадаларга, лицейдеги курстардагы тесттерге катышып жүргөндүктөн оорчулугун сезбедим. Жогорку упай топторума ишеним бар болчу. Бирок алтын сертификатка илинип каларымды күткөн эмесмин.
- Сен үчүн өлкөдөгү окуу жайларды тандоого эң сонун мүмкүнчүлүк түзүлдү. Кайсыл окуу жайды, кандай кесипти тандаганы турасың?
- Мен программист адистигин тандагам. Кыргызстандагы окуу жайларды азырынча тандай элекмин. Чет мамлекеттеги окуу жайларга да кызыгып жатам. Кайсыл окуу жайды тандабайын адистигим ошол бойдон калат. Бир туугандарым, атам колдоп, кубаттап жатышат. Дагы кеңешип, анан бир чечимге келебиз. Жакшы окуп, билимимди өлкөбүздүн өнүгүүсүнө жумшайм деген тилегим бар. Өлкөбүзгө, элиме кызмат кылгым келет. Апам оорудан улам көз жумган. Адистигим дарыгер болбосо да, өз кесибим аркылуу бейтаптарга жардам берсем деген максатым бар.
Лицейдеги мугалимдериме, класс жетекчиме жана бизди тестирлөөгө даярдаган мугалимдериме өзгөчө ыраазычылыгымды айткым келет. Ийгилигибиздин артында биздин мугалимдер жана ата-энелерибиз турат.
http://jalal-abad.turmush.kg/news:369424