Жалал-Абад ОИИБдин жетекчилиги тарабынан облус аймагында кылмыштуулуктун алдын алуу жана жарандардын арыз-даттануулары менен жеринде таанышуу максатында эл менен жолугушуулар уюштурулуп жатат. Бул тууралуу Жалал-Абад ОИИБдин басма сөз кызматынан кабарлашты.

Маалыматка караганда, жетекчилик милициянын көчмө кабылдама унаасы менен райондорду кыдырып, жергиликтүү тургундардын көйгөйлүү маселелерин угушууда.

Жалал-Абад ОИИБдин башчысынын сотко чейинки өндүрүш иши боюнча орун басары, милициянын полковниги Алмаз Кудайбердиев Базар-Коргон РИИБдин башчысы, милициянын полковниги Медербек Муратов менен биргеликте милициянын көчмө кабылдама унаасында жергиликтү тургундардын сунуштарын укту. Алар жарандар менен маектешип, суроолоруна жооп берип, милиция менен элдин ортосунда жаралган маселелерди талкуулашты.

Район тургундары кайсы аймакта болбосун милициянын көчмө кабылдама унаасындагы кызматкерлерге арыздарын калтырууга болору белгиленди. Кабыл алынган арыз-даттануулар тиешелүү тараптарга жөнөтүлүп, милицияга тиешелүү кагаздарга ыкчамдык менен чаралар көрүлөрү айтылды.

Ал эми Кербен шаарынын тургундары менен Жалал Абад ОИИБдин башчысынын ыкчам иштер боюнча орун басары, милициянын полковниги Кеңешбек Рахманов менен Аксы РИИБдин башчысы, милициянын полковниги Айылчы Мырзамамытов жолугушту. Алар жергиликтүү тургундардын сунуштарын кабыл алышып, укук бузуулардын алдын алуу багытында түшүндүрүү иштерин алып барышты. Кеңешбек Рахманов андан ары Ала-Бука РИИБдин башчысы, милициянын полковниги Райымбек Сулайманов жана жергиликтүү бийлик өкүлдөрү менен биргеликте Ызар жана Балтагулов айыл өкмөттөрүндө эл менен жолугушту.

Жарандар тарабынан берилген сунуштар милициянын көчмө кабылдама унаасында кабыл алынып, профилактикалык иштер жүргүзүлдү. Суу кырсыктарынан жана коронавирустан сактануу керектиги эскертилип, өспүрүмдөрдү тынымсыз көзөмөлдөө зарылдыгы белгиленди.

https://jalal-abad.turmush.kg/news:439634