Жалал-Абад облусундагы Таш-Көмүр жана Үч-Коргон ГЭСтеринин бирден агрегаттары капиталдык оңдоодон өтүүдө. Бул тууралуу Таш-Көмүр ГЭСтеринин каскадынын башкы инженеринин орун басары Талант Тургунбаев билдирди.
Анын айтымында, учурда Таш-Көмүр ГЭСинин 2-агрегатында кезектеги капиталдык оңдоп-түзөө иши жүрүп жатат жана жакынкы күндөрү толук буткөрүлөт. Буга чейин Үч-Коргон ГЭСинин 4-агрегаты 46 күндүк капиталдык оңдоодон өткөн.
«Бүгүнкү күндө Шамалды-Сайдын 3-агрегатында 14 күндүк утурумдук оңдоо жумуштары жүрүп жатат. Негизи утурумдук оңдоо иштерин өзүбүздүн кызматкерлер жасашат. Агрегаттардын ар бир бөлүкчөсүнө чейин каралып, майлар толукталып, тийиштүү иштердин баары жасалууда. Буюрса кыш мезгилине даярдыгыбыз дээрлик аяктап калды. Режим боюнча ишке киргизүү алдында турабыз», - деди ал.
Маалым болгондой, Таш-Көмүр, Үч-Коргон, Шамалды-Сай ГЭСтеринде жалпы 10 агрегат бар. Быйылкы жылы өкмөттөн мындагы объектилерди капиталдык, утурумдук оңдоодон өткөрүү үчүн жалпы 89 миллион сом бөлүнгөн. Агрегаттар ар 5 жылда кезектеги капиталдык оңдоодон өтүп турат. Келерки жылы 3 агрегат өтөт. Жыл башынан бери Таш-Көмүр ГЭСтер каскадында 2 миллиард 850 миллион киловат-саат электр энергиясы өндүрүлгөн.
Жылына 4 миллиард киловатт-саат элек энергиясы өндүрүлөт.
https://jalal-abad.turmush.kg/news:444802