Turmush басылмасынын кабарчысына маалым болгондой, имараттын ичиндеги терминалды талкалап, акчаны алышкан. Ошондой эле айыл өкмөт башчынын иш бөлмөсүндөгү сейфти, камераны талкалашкан. Дагы бир кызматкердин бөлмөсүндөгү документтерди чачышкан.

 

Ал эми Жалал-Абад ОИИБдин басма сөз кызматынын маалыматы боюнча, 2023- жылдын 31-январь күнү Базар-Коргон РИИБге Кеңеш айыл аймагынын тургуну — 1970-жылы туулган М.Б. арыз менен кайрылган. Анда 31-январга караган түнү Базар-Коргон районунун Кеңеш айыл өкмөтүнүн имаратына орнотулган ачык акционердик коомунун төлөм терминалын белгисиз адамдар бузуп, болжол менен 25 000 сомго чейинки акча каражатын уурдап кеткендигин билдирип, кылмыш жасагандарды таап, материалдык чыгымдарды өндүрүп, мыйзам чегинде чара көрүп берүүнү суранган.

 

Ошондой эле 2023-жылдын 31-январь күнү Базар-Коргон РИИБге Базар-Коргон районунун 1979-жылы туулган тургуну — жабык акционердик коомдордун биринин Базар-Коргон филиалынын юристи Ч.У. арыз менен кайрылган. Анда 31- январга караган түнү Базар-Коргон районунун Могол айыл өкмөтүнүн ОоганТалаа айылында ЖАКтын филиалынын имаратынын ичине орнотулган төлөм терминалын белгисиз адамдар бузуп, ичиндеги 195 790 сом акча каражат салынган кассетасын кошо алып чыгып кетишкенин билдирген. Ал мыйзам чегинде чара көрүп берүүнү суранган.

 

Аталган арыздар 2023-жылдын 31-январь күнү Базар-Коргон РИИБдин маалыматтардын электрондук журналына катталып, тергөөгө чейинки текшерүү иштери башталды.

 

Ошондой эле бул факты боюнча Базар-Коргон РИИБдин ыкчам тергөө тобу окуя болгон жерге чыгып, кароо жүргүзүлүп, схемасы чийилип, сүрөт-таблицалары түзүлүп, тийиштүү материалдар чогултулуп, эшик жана темир сейфтерден кол манжа издери алынды. Кылмыштин бетин ачуу максатында тергөө тапшырмасы берилип, ыкчам иш аракеттер жүргүзүүлүдө.

 

Источник: https://jalal-abad.turmush.kg/ky/news:496526