АКШнын президенти Жозеф Байден экинчи ирет президент болуу ниетин билдирип, 2024-жылдагы шайлоого катышууну көздөп жатат. Бул туурасында Washington Post жазган.
USA Today басылмасы менен Саффолк университетинин ноябрдагы сурамжылоосу азыркы мамлекет башчынын ишмердүүлүгүн шайлоочулардын 38 пайызы гана колдой тургандыгын көрсөткөн. Ал эми көпчүлүк азыркы президенттин мындай кадамына каршы экендигин билдирген.
Байден 82 жашында 2024-жылы өтө турган АКШ президентинин шайлоосуна катышуу ниетинде. Анткен менен демократтар (ал учурда 57 жашка чыга турган) Камала Харриске басым жасап жатышат.
Газета акыркы күндөрү президенттин тегерегиндегилер анын кайрадан шайланууга даяр экендигин билдиргенин кабарлады. Ошол эле учурда партия Байдендин жаш курагын, Ак үйдүн колдоосу төмөндөгөнүн жана пандемия менен инфляция боюнча электораттын түйшөлгөнүн эске алып, бул чечимден күмөн санап жатканы жазылган.
"Андан бир эле нерсени, кайрадан шайлоого катышууну пландап жатканын уктум", — деген президенттин досу, мурдагы сенатор Крис Додд.
Басылма эгерде Байден чын эле шайлоого катышам деп чечсе, демократтардын расмий адамдары алгачкы этапта колдой турганын жазган. Муну менен катар эле айтылган пландарынан баш тартса праймериз алдында партия лидерсиз калат. Газета вице-президент Камала Харрис көпчүлүктүн колдоосуна ээ боло албайт деген пикирди да жазган. Транспорт министри Пит Буттижич бул өнөктүктөгү мүмкүнчүлүгү жакшы талапкер катары каралган. Маалыматта расмий жарыя Конгресстеги кезектеги шайлоолор бүтмөйүн жасалбастыгы жазылган.